10 дугаар сарын 21-ний өдөр Ерөнхий консул Кэ Юушэн Өмнөговь аймгийн Гашуунсухайт боомтод ажиллаж, боомтын үйл ажиллагаа болон Хятад, Монголын Ганцмод–Гашуунсухайт хил дамнасан төмөр замын бүтээн байгуулалтын явцтай танилцав. Тэрбээр Монголын талын боомтын захиргаа, хилийн цэрэг, гааль, ГИХГ-ын удирдлага, “Тавантолгой төмөр зам” ХХК, “Хятадын төмөр замын барилгын гүүрийн инженерийн товчоо групп” ХХК-н төлөөлөлтэй уулзалт хийв.

Боомтын холбогдох байгууллагуудын удирдлагууд энэ онд авто замын боомтоор нэвтэрсэн ачаа тээврийн хэмжээ, зорчигчдын хөдөлгөөн, дэд бүтцийн бүтээн байгуулалт болон гаалийн бүрдүүлэлтийг цахимжуулах ажлын явцын талаар танилцуулав. Тэд хоёр улсын боомтын хамтын ажиллагаа нягт уялдаатай байж, гаалийн бүрдүүлэлтийн үр ашиг дээшилж, Хятад руу экспортлох нүүрс болон зэсийн баяжмалын хэмжээ нэмэгдсэнийг онцлов. Хил дамнасан төмөр замын төслийн талууд бүтээн байгуулалтын явцын талаар мэдээлэл өгч, төслийн нийт гүйцэтгэл 65 хувьд хүрсэн бөгөөд саяхан бүх Т хэлбэрийн дамнурууг амжилттай угсарч дуусган, зам тавих ажлыг эхлүүлснийг танилцуулав. Одоогоор Хятад, Монголын хоёр талын бүтээн байгуулагчид нягт хамтран ажиллаж, төслийн ажлыг эрчимжүүлэн, ирэх онд төлөвлөсөн хугацаанд нь ашиглалтад оруулахаар хичээн ажиллаж байна.